samedi 12 mars 2016

Charles Baudelaire: " Franciscae meae laudes",






Franciscae meae laudes


Novis te cantabo chordis,
O novelletum quod ludis
In solitudine cordis.


Esto sertis implicata,
O femina delicata,
Per quam solvuntur peccata !



Sicut beneficum Lethe,
Hauriam oscula de te,
Quæ imbuta es magnete.



Quum vitiorum tempestas
Turbabat omnes semitas,
Apparuisti, Deitas,



Velut stella salutaris
In naufragiis amaris.
Suspendam cor tuis aris !



Piscina plena virtutis,
Fons æternæ juventutis,
Labris vocem redde mutis !



Quod erat spurcum, cremasti ;
Quod rudius, exæquasti ;
Quod debile, confirmasti.



In fame mea taberna,
In nocte mea lucerna,
Recte me semper guberna.


Adde nunc vires viribus,
Dulce balneum suavibus
Unguentatum odoribus !



Meos circa lumbos mica,
O castitatis lorica,
Aqua tincta seraphica ;



Patera gemmis corusca,
Panis salsus, mollis esca,
Divinum vinum, Francisca !

Treizième pièce de l’édition de 1866 des Épaves de Baudelaire.
 Ce poème en octosyllabiques rimés, dont le sous-titre est 
« Vers composés pour une modiste érudite et dévote »,
 est aussi le soixantième des Fleurs du Mal. 

Charles Baudelaire